أبو وش بشوش .. مي يحيى

اخر قرائه من
اقل من
1 دقيقه
قراءت الموضوع

أبو وش بشوش .. مي يحيى

مارس 07, 2018 - 17:45
التصنيف:

 

أبو وش بشوش يديك ضحكة

ويقولك دايماً إوعى تخاف

وفـ لحظة ضعفه وخوفه وألمه

يكون شفاف

ويشوف الناس لكن جواه

عمره ما يتشاف

أبو وش بشوش المتفائل

بيجيب الضحكة من الوحلة

ويشد على إيديك ويقولك

إن الـ هيجى أكيد أحلى

وإن الأيام زى ما صعبة

فى غيرها كتير أيام سهلة

أبو وش بشوش تلقاه جانبك

وقت ما تحتاجله يكون صاحب

فى الشدة يداوى ويطبطب

ولفعل الخير دايماً حابب

وفـ وقت الفرحة تملى معاك

ولا يمكن مرة يكون غايب

أبو وش بشوش دايماً صافى

صعب يجافى ومايتلونش

لو مهما تغيب وقت ما ترجع

هيقابلك بردو بـ نفس الوش

وإن حب فـ يوم يعتب ويلوم

مش محتاج منك غير معلش

أبو وش بشوش لما بيحزن

يختار البعد ويبقى وحيد

ويفضفض مع نفسُه ويرجع

ويساعد غيره ويبقى سعيد

يقفل على حزنه بـ 100 مفتاح

ولا يشكى ولا يقول ويعيد

أبو وش بشوش إنسان عادى

موجود جوايا وجواك

مش محتاج منك تتغير

ولا محتاج منك تبقى ملاك

كل الـ عليك تفضل فاكر

إن الخالق دايماً وياك      

تصنيف آخر: 
0