رسائل مرتبكة........... لــ محمد نشأت

اخر قرائه من
اقل من
1 دقيقه
قراءت الموضوع

رسائل مرتبكة........... لــ محمد نشأت

يوليو 09, 2013 - 01:16
التصنيف:

 

في يوم قعدت فى صينية ميدان التحرير... بعد يوم كله ضرب وإصابات، واللى حواليا اللى رابط راسه واللى رابط ايده وكل الموجودين متبهدلين،

راجل كبير قالنا: " أيًا كان اللى بيحصل دلوقتى... هييجى يوم مش هتبقوا حاسين بأى تعب أو إصابة من دى،  وتحسوا بفخر وأنتوا قاعدين تحكوا لأولادكم البلد دى كانت عاملة أزاى أيام الاستبداد، وأنكم تعبتوا قد إيه لحد ما بقت بلد فيها حرية وعدل ( وقتها يعنى ).

 كنت دايمًا بصبر نفسى بالكلمتين دول... دلوقتى أنا أشك أصلاً إن الجيل اللى بعدنا هييجى فى عصر حرية أوعدل "المشوار لسه طويل أوى".

****

الثورة ضمت كل الشعب تقريبًا باستثناء الفلول

سقط منها العسكر لما باعو الدم

سقط منها الإخوان لما باعو الدم

وهيسقط منها ناس كتير دلوقتى برضه بتبيع الدم

 الثورة مبادئ مش مصالح

****

 شرعية الرئيس ... بجنييييييه ... جنييييه يا أستاذ

إسلامية إسلامية ... بجنيييييييييه ... بجنييييييه واحد

الثورة مستمرة بجنييييييييييييييييه ... بجنييييييييه

حق الشهدا بجنييييييييه ... بجنييييييه يا بييييييه

أكثر من مجرد هتافات بائعين ...

أسلوب تعامل الكثيرين مع الثورة دون أن يدروا

****

 

"سؤال مهم" ..

هوة احنا هنشتم أزاى فى رمضان ؟!!

هى البلد دى ينفع نعيش فيها من غير شتيمة ؟؟

******

 

تعريف البنى آدم القذر : هو اللى ييجى يتشحتف أوى ويقولك: عشان نبقى منصفين يعنى قتل الإخوان غلط برضه.

عشان تبقى بنى آدم بس .. قتل أى حد هو جريمة أكبر عند الله من زوال الدنيا

****

مش محتاج تكذب وتقول إنك كنت بتصلى الفجر عشان يبقى دمك حرام !!

مش محتاج دمك يقع فوق المصحف عشان أتعاطف معاك !!

مش ضرورى تجيب رصاصة مش مضروبة فى إيدك أو تفبرك فارغ مفروض إنه مبيقعش عندك أصلا عشان تصعب عليا !!

دمك حرام .. حتى لو كنت بتشرب خمر مش بتصلى !! ، وحتى لو دمك وقع على الأرض مش على المصحف !! ومن غير ما تجيبلى رصاص فى إيدك.

****

وتلاقى صور لقتلى الإخوان محطوطين جنب بعض فى منظر يدمى القلب..

وييجى إنسان غبى من الجنب يفقعك ويحط صورة مرسى فوقهم

****

عندى يقين إن هييجى يوم مش هيحكم البلد دى لا فلول ولا عسكر ولا إخوان،

وهيكون السيسى وصدقى صبحى جنب طنطاوى وعنان جنب حسنى مبارك فى السجن.

 

وحتى ذلك الحين .. الثورة مستمرة

أخبار متعلقة