الخبر التالي

نزيف روح

اخر قرائه من
اقل من
1 دقيقه
قراءت الموضوع

نزيف روح

فبراير 06, 2017 - 22:32
التصنيف:

 

أصلب ضهرك في صدر السرير الخشب

وضم ليك رجليك، وافرد حزنك وشبه بيك التعب

 واقفل عينك، وسمرها على ركبك

 وافرش صورتها بالعرض فوق عضمك

 لف الحنين جسمك في شكل جنين..

أو نقشك في شجرة الضلمة دودة قز

كتبك بطل الليل

وبين قوسين دورك (جرعة هوا في قبر)

(حقنة بنج للصبر) أو

 الخط مش واضح أو أنت رافض تعترف! معرفش

 حياتك والموت نسخة طبق الأصل!

 في اللحظه دي.. تقريبًا النور قطع  أو اتهزت التربيزة من رعشة النص

فغرقت القهوه في عين السطر

 أو انشغل بطيف حبيبته المر

 أو طفح القلم فوق اسمها

بيداري في حروفه اللي اتعرت من البعد

 أو قسم نفسه ساعتها مع الألم، وقدم طلب وظيفة في العدم

قال لنفسه بفرح كان باين إنه مفتعل! مين أنا بالظبط؟!

 وليه بكتبني بصيغة المجهول؟! وليه دول بيموتوا فيا

 وليه عنيا رغم النظر في عينها معميه؟! وليه الوريد في ايديا بيترعش

كل أما أبوس اسمها في قلبي؟! وليه قلبي بيعتبني على عياطها الي مش ذنبي؟! أنا آسف..

 يمين الله أنا أسف

أنا عارف إن أنا الجاني

 بس الدنيا شنقاني

 أنا اللي علقتك بيا وأصلا

كنت لدنيتي مش ماسك

متماسك.. في كل مناسك حزن قابلتني

وكنت فاكر إني مناضل

 أتاري الحزن كان فاضل

 بيسخن ونازل يجري في روحي بحماسة

كأنك "ماسة" وأنا خاتم مليش لازمة وأنا بدونك

 كأن الكون كله في عيونك

 ولما عيطتي شربنا نهاية العالم

أنا حالم، طايش، وطموح لدرجه الإحباط

 وغلاط

ومليش في الموضه والشكل والحسابات

 وعيل السن، عجوز الروح

 جايز فوق حاجبي أربع خطوت مقام للكسرة وعلامة للأزمات

ونصيبي من الرحمة اتخلق في عنيكي يرضيكي؟؟

 تعيطي

 قصدي يرضيكي تبكينى؟

 وأعيش فيا عليا اللعنة! اشمعنا  ياعم القدر دلوقت

 لما تحبني وأحبها تقشرنا من بعض

 محييت الحرب بالحرب

القهوه كذب

 والقمر ضل الشمس كذب

 وأنا وأنتِ كذب صادق في الغياب

 وكنايس لبسها الناس بسور العهر

 أنا وأنتِ "حب" واحد وصادق في وسط الصنم زي "رب" بس أنتِ عارفة دول بشر راكب هواهم قلبهم

 فبينكروا جهرا وبينا بيكفروا

لو كنا ساكتين فده احتراما للنصيب

دموعك بتخبط علي جفونك

افتحيلي بموت

 وأنت لسه عامل جنين

 ورابط إيديك عليك

ولعينك أوي مشبك

 ومستني الفجر يأذن

 وقتها تتفك

من حبل التماسك السري

 وتعيط! وتقول يارب

خايف أوي مني من غيرها

فطمني ورجعها

وتقول بكل ما باقي من روحك

يارب أنا عاصي

وبتعامل مع الحرام بمنطلق "عادي" أنا راضي بعقابك

وبنادي برحمتك

 متعقبنيش فيها

 ومتسقهاش ذنبي يارب ارحمني

واديني فرصه أتوب

 بحبها فيك والحب تهذيب

 فاديني فرصة كمان

ورجعني لوصالها

يارب أنا عشمان

وتعبان من غيرها

0

أخبار متعلقة