رسول السما

اخر قرائه من
اقل من
1 دقيقه
قراءت الموضوع

رسول السما

فبراير 06, 2017 - 22:39
التصنيف:

 

السما باعته رسولها الشتا

يتلو الغرام لقلبي وقلبها 

ماسكه إيديا أوي ومتبتة

وفي إيدي التانية شمسية

بفتح ضلوعها وارفعها 

تكنس عنها المطرة

 "فجأة"

السما لما لقتنا بنقولها لسه

عايزين نأمن لكن الخوف ماسكنا!

شبكنا عيونا وقربنا

والعشق وقتها حولنا

لكفوف بالشوق بيرفعنا  

وبيدعي الرب

يخلي السحاب يغنينا ويعزفنا

لتاني مرة تقول الدنيا كلمتها

المشهورة بالدقة "فجأة"

بعتت لنا مليون رسول ونبي

وكأن القدر حالف لندخل الجنة

مشينا وسبنا الخوف

أو هو أخيرًا خاف ومشي وسبنا

بيلبس المشهد فستان السرعة

وبخفة نجري أنا وهي

نلبس الحيطة

المشبوكة تحت بلكونة

وكأنها مسكونة بينا من قبل

أو عارفة إننا هنعدي من هنا

أو هي في الأصل اتخلقت علشنا

وفضلت سنين تستني

لحظة ميلاد الجنة

من رحم شفايفنا البكر

إزاي يعني كنا نشوف

باب الجنة موارب

ونفتح باب الصبر 

ومندخلش!

إزاي معرفش؟!

عرفت أقطف إيديها

علشان أداري

قلبي اللي أصبح من الاشتياق عاري

وأخليها تغطي بشفايف إيديها

دقات بتنبت في ضوء عنيها

بسرعة الضوء

بجري وراها بروحي لجل الحقها

لكن من الشوق

نفسي اتقطع!

لما شب الحنين واتصرع

وأكل اللي باقي

من تماسك شكلي الهش المصطنع

"فجأة"

سلمت لعيونها إسرافيل

ينفخ في قلبي النفختين

الأولى شفايفها

والتانية ضحكتها

خارج من أجداث نفسي بجرلها 

جرسون ديسكو الهوي

لابس فيونكة بيضة مخططة بحنين

نزلي مينيو لسانها

مليان بأنواع خمور ريقها

وهي قاعدة على كرسي ضلوعي

بتحقني شامبنيا

كل نعيمك كفة 

وشفايفك العليا وحدها كفة

أنا قلبي كان ع الحافة

حبة هوا منك دخلوا جوايا

ياخدوا في الأوردة لفة

مش عاملين حسابهم يشتروا

خرجوا بقلبي وطبلته

وبحبة شنط ضمة          

وحشتيني "حتى" تموت "حتى"

أنا عطف بيان منك

ومنعوتك الوردة

ي أقدس أنثى في صنف النسا

أنا بوعدك مهما بلغ حد "إذا"

أنا في عتباتك شاري "على"

فطمني

ي اللي أنتِ أقرب ليا من أنا

أنا قولتلك كل الكلام ده

وأنتِ في حضني ثابتة

زي الكامنجة بتهزي فيا

وبترقصي على كل عرق ووتر

المختصر

إن "فجأة"

علمنا القدر

إن مفيش حاجة اسمها صدف

وإن كل حاجة مترتبة

وإن "فجأة"

معاد مقدس

كافر بحاجة اسمها ترتيب

وأنا الآن كافر

بحاجة في الحب اسمها عيب

قطعت كل الترتيبات والمواعيد

وسبت اللجام للقدر

يجريني في ساحة الفجأة

كما شاء

كنا أنا وأنتِ عشاق

و"فجأة"

بقينا احنا العشق!

0

أخبار متعلقة